خايف.. بقلم الشاعر مدحت غانم

خايف
انا خايف اضحك
الدنيا تعاند وايايا
انا كل ما بضحك
بكتم الضحكة جوايا
ياما نفسي اعيش
واصرخ واغني
واروح ولا اجيش
واطير واحلق وسط سحاب
ولا اشفش بعيني تاني ضباب
واقول من قلبي ولا اخبيش
حبيتك موت
في عيونك سحر غريب ملكوت
وانا هعمل ايه
دانا كل ما اقرب افكر اقول
الاقي كلامي قلب بسكوت
والضحكة تعليّ جوايا
واشوف البسمة في مرايه
لكن ما اضحكش
ما انا خايف اضحك
الدنيا تعاند وايايا
انا خايف اغني
ينزل دمعي غصب عني
وتدور الدنيا
وافضل في مكاني انا مستني
واعيش حكايات
وحكايتك ليه مليانه آهات
وانا هعمل ايه
دانا كل ما اقرب تفكر ادوب
تسقيني المرّ انا بالذات
والصرخة تعليّ جوايا
تبتسميلي في بدر صبايا
لكن مضحكش
مانا خايف اضحك
الدنيا تعاند وايايا