سيد محمد أحمد يكتب.. حكومة باللون الغامق

 سيادة رئيس الوزراء … مواعيد غلق المحال والمقاهى وورش الغلابة هى التى تمنع انتشار كورونا .. ده على اساس ان كورونا بتنام بالنهار وبتصحى بالليل …سيادة رئيس الوزراء الناس أصبحت فاهمة كل حاجة وقراراتكم أصبحت مسخرة بين الناس .. سيادة رئيس الحكومة ارحموا الشعب يرحمكم الله وكفاية عليكم كدة طالما غير قادرين على المسؤلية … سيادة رئيس الوزراء .. هى كورونا كانت مشت وجت ماهى كانت موجودة والناس بتموت فى منازلها كل يوم … بس انتم ال كان ليكم رأى آخر … اخيرا سيادة رئيس الحكومة خلى بالكم لحسن كورونا تخدعكم وتصحى بالليل وتنام بالنهار ….
$ سيادة وزير التعليم …تصريحات كم أصبحت مستفزة وآخرها امس تقول ان الدراسة مستمرة سواء فيه كورونا او مافيش ..ده على اساس أننا لسنا فى دولة … يعنى نضحى باولادنا علشان خاطر سيادتكم …وطيب آمال بتستعجل ليه على دفع المصروفات وضاغط على المدارس وأولياء الأمور بسرعة دفع المصروفات … سيادة وزير التعليم نحن نعلم مثلك ان القرار ليس قرارك ولكن انت تنفذ فقط فياريت تبقى تسأل أصحاب القرار أولا .. سيادة الوزير الناس أصبحت لا تثق فيكم ولا فى قراراتكم وبعض الناس ينتظرها للضحك والسخرية …سيادة الوزير طبعا احنا مش هنتكلم هنا عن التعليم ال تم القضاء عليه فى عهدك لان مساحة المقال لا تستوعب ما تم تدميرة على يديك …وأخبر الناس تنتظر الخبر السعيد ولاكن ليس منك بل عليك … وشكرا على جهودكم المدمرة …
& سيادة وزيرة ( كورونا ) الصحة سابقا …حضرتك هى الأعداد الموجودة بالتقرير اليومى الذى يملأ علينا يوميا بتجبوها منين .. حبة فوق وحبة تحت … لدرجة ان الشعب ينتظرها يوميا للضحك فقط ..سيادة الوزيرة الناس يأست منكم … وكفاية كدة والله شهادة شعب انكم أفشل حكومة مرت على مصر … سيادة الوزيرة المرض موجود ولم يرحل وانتم ضحكتم على الشعب الغلبان علشان مصالح ناس تانية والناس بتموت كل يوم ومستشفياتكم مغلقة فى وجوه الناس … كل واحد بيعزل نفسه بنفسه يعنى يصارع المرض وحده …طيب حضرتك بتجيبى التقرير اليومى ده منين …وكل ال انتم قدمتوه للشعب الغلبان هو زيادة تذكرة المستشفيات الحكومية علشان مايقدرش يتعالج ويموت وتسترييحوا منه … سيادة الوزيرة نحن نعلم مثلك ان القرار ليس قرارك بل انتم تنفذوا فقط ..فيارت تبقي تسألى فوق أولا
$ سيادة وزير الداخلية … ياريت سيادتكم تزور وحدات المرور او ترسل رجال التفتيش بالوزارة ..لان الشكاوى يوميا من الأسعار المبالغ فيها للتراخيص حيث أصبحت تفوق ثمن السيارة … سيادة الوزير الناس بتصرخ وتثتغيث هو ايه ال حصل طبعا ده غير المعاملة الغير آدمية داخل المرور …سيادة الوزير ايه الزيادة الغير مبررة لكل شئ …
& بعد خروج مرتضى منصور من البرلمان يتبقى اثنين من أضلاع مثلث الفساد فى الرياضة المصرية وهم عمرو الجناينى والوزير أشرف صبحى .. ده لو كنا عايزين يبقى فيه رياضة عندنا بجد ….؟
وربنا يجعله عامر ….. وإلى اللقاء فى مقال قادم ……………….؟