دكتوره شيرين ذكى تنصح :هذه هى أنواع “الجبن” الآمن

كتير أوي من حضراتكم بيسألوني ايه الجبنة الآمنة الي اقدر أجيبها لأولادي ؟

وايه هي الانواع الي ممكن اثق فيها ؟

في البداية عندنا نوعين من الجبنة

★ نوع محضر من اللبن الطبيعي او مضاف له قشدة او زبدة طبيعية

★ نوع نباتي الدهن بيتم الاستعاضة بزيوت نباتية فيه وخاصة زيت النخيل الذي يدخل كمكون أساسي فيها ليحل محل دسم اللبن الذي يدخل في تصنيع الجبنة والذي يتم نزع دسمه واستبداله بزيوت نباتية لضغط وتقليل التكلفة والسعر

بعض الشركات تنتج الجبنة الطبيعية وتنتج ايضا الجبن نباتي الدهن ، طب ليه ؟

لان ده بيتباع بسعر والتاني بيتباع بسعر تاني خالص ، نوع شعبي اقتصادي رخيص الثمن ، ونوع غالي لا يحتوي الا على المكونات الطبيعية

طب ايه الفرق بينهم يا ست الدكتورة الله يكرمك ، وايه خطورة الجبن نباتي الدهن ؟؟؟

السببين الرئيسين لأضرار الجبن نباتي الدهن :

1_ يتم إضافة بعض المستحلبات التي لها مخاطر صحية محتملة . مثل فوسفات الصوديوم وهو أحد العناصر التي يحذر منها الأطباء لأنه يمكن أن يؤدي إلي أضرار وتلف الكلى . كما توجد مستحلبات أخري مثل فوسفات البوتاسيوم والذي قد يسبب الحساسية والإسهال.

2_ الدهون المشبعة :

تحتوي الجبن النباتي علي الدهون المشبعة والتي يحذر منها الأطباء حيث تؤدي إلي أمراض القلب والأوعية الدموية أو مرض السكري .

طبعا الاخطار دي بتكون على المدى الطويل جدا مش في يوم وليلة

طيب انا دخلت السوبرماركت اهوو ، او رحت عند عم صبحي البقال ، من نظرة عين كده يا ست الدكتورة يا فاهمة اعرف ازاي الفرق بين النوعين من غير رغي كتير الله يكرمك

سيادتك هتدخل باشا ، حاطط ايدك في جيبك ، وتبص بنظرة واحدة على العلبة هتلاقي الآتي :

★ الجبن الطبيعي مدون عليه احدى العبارات التالية :

_ طبيعي 100 %
_ او خالي من الزيوت النباتية
_ او لا يحتوي على زيوت نباتية

طب لو ده كله مش مكتوب ؟؟
بسيطة هتقلب العلبة وتقرأ مكوناتها هتلاقي كلمة يحتوي على زبدة طبيعية او يحتوي على قشدة ومفيش اي سيرة خالص للزيوت وخاصة زيت النخيل

★ الجبن نباتي الدهن ، هتلاقي مكتوب عليه حاجة من دي :

_ جبن نباتي
_ او جبن نباتي الدهن
_ او جبن معدل بالزيت النباتي
_او جبن محضر بالزيت النباتي

طيب لو كل ده مش مكتوب على العبوة اعرف منين ؟ هتقلب سيادتك العبوة وتقرأ المكونات تلاقي كلمة زيت نباتي ، وكلمة زيت النخيل بتاخدك بالأحضان.

ملحوظة : كلمة لبن فرز المدونة على بعض العبوات معناها لبن خالي الدسم.

يا رب تكونوا استفدتوا ، وعرفتوا ازاي تفرقوا بين النوعين ، وجبت لحضراتكم نماذج من انواع بالفعل موجودة في السوق المصري ، تفتحوا الصور وشوفوا مكان كل علامة عملتها لكم

 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى