ادينى ودنك بقلم / سيد محمد أحمد حكومة عجب جابت رمضان قبل رجب

عزيزى القارئ عزرا انا لم أجد ما أقوله هذه المرة لانى كرهت الشغل والصحافة والتلفزيون ولم أستطيع ان أتحمل الكذب والخداع عيني عينك طيب كل ده ليه ماانتم فتحتو الدنيا على البحرى وضربتم الناس كورونا فى خلاط واحد وال هيقدر يخلص على التانى هو ال هيعيش طبعا دى نظرية عبقرية وغير مكلفة حتى علشان يبقى عندا أعلى نسبة شهداء فى العالم ويحتسب لنا رقم عالمى طالما فشلنا فى كل المناسبات العالمية واوعوا تنسوا صفر المونديال العظيم المهم خلينا فى ال احنا فيه
فى شهر مارس الماضى قامت الدنيا ولم تقعد فى مصر وأعلنت الحكومة ان مصر فى خطر كبير من وباء كورونا دون عن جميع دول العالم والمنظمة العالمية تصرخ بأعلى صوت لابد من تطبيق أشد الاحترازات وهنا قامت الحكومة بغلق البلاد تماما وأخذت المفاتيح ووضعتها فى جيبها والداخل فى جيب الحكومة ربنا ياتولاه تم فرض حظر التجول العظيم وإلزام الكمامات والجونتات وزجاجات المطهر وما أدراك ما المطهر واسعاره كل هذه الإجراءات تم فرضها على المواطن بعد أن افقدته الحكومة عمله ومصدر رزقه والزمته البيت اجبارى وان خرج مضطر إلى الصيدلية يتم القبض عليه لدفع ال 4000 جنيه السبوبة التانية كل ده والمواطن ملتزم بتعليمات الحكومة وغرامات الحكومة القهرية بالتلاكيك وهو برضوا ملتزم ماهى الحكومة وعارفه كل حاجة هو احنا هنعرف احسن منها
عزيزى المواطن خد عندك الكبيرة قوى رغم كل هذا الغلق لكل شئ وحبس الناس فى البيوت وحظر التجول الشهير اعداد الإصابات والوفيات كانت فى ارتفاع مستمر يوميا
عزيزى المواطن خد عندك الأكبر بعد الفتح المبين اول يوليو الحالى بقدرة قادر الأعداد فى النازل يوميا يا نهاااااااااااااااأار اسود ايه الهرم المقلوب ال احنا عايشين فيه ده طيب ازاى علماء الرياضيات يحلولنا هذه المعادلة ولو فيه حد عنده تفسير يقول لنا
عزيزى المواطن كما أشارت لك فى البداية أنني كرهت العمل الإعلامى كله لان التقرير اليومى لوزارة الصحة الذى يتم توزيعه علينا إجباري بالمطوه نعلم أنه كله كذب وخداع من الأول إلى الاخر لان بعد شهر واحد من الأزمة المزعومة للحكومة تم غلق المستشفيات أمام المصابين ولم تستقبل المستشفيات اى حالة منذ هذا التوقيت وكل مواطن وكل أسرة كان حجرهم الصحى فى منازلهم ولا احد يعرف عنهم شئ حتى عند الموت الكل فى صمت طيب الأعداد ال بيملوها علينا يوميا بيجبوها منين لما المستشفيات ال هي المصدر الوحيد للحكومة مغلقة بالضبة والمفتاح أمام كل الناس كورونا وغير كورونا ده حتى لما فتحوا كل شئ لم يجدوا مفتاح المستشفيات ضاع من الحكومة ومازالت المستشفيات هى الحاجة الوحيدة ال مقفوله ومحدش عارف ليه يا ترى علشان الخلاط يجيب نتيجة كويسة نظرية برضوا توضع فى الاعتبار
طيب وبعدين يا حكومة العجب مش كفاية كده هو انتم لما اطلقتم الشعب على الفيروس فجأة الفيروس هرب من مصر طيب والله دى نظرية عبقرية يجب ان تصدر للعالم ونفتخر بقى بدمغكم وعبقريتكم الفاذه
عزيزى المواطن فيه حاجات كتيرة مش فهمنها وحاجات كتيرة عارفنها ومش قادرين نتكلم فيها وهى دى المعادلة الأصعب
وربنا يجعله عامر
وإلى اللقاء فى المقال القادم