ادينى .. ودنك سيد محمد أحمد / يكتب فيه حاجة غلط

فخامة السيد / الرئيس ….
نحن نقدر مجهودات فخامتكم على جميع المستويات للنهوض والوصول بالوطن إلى أعلى مكان بين دول العالم … ولاكن سيادتكم الحكومة تسلخ الشعب قبل الذبح … ده يتم علشان هناك حاجات غلط كثيرة والشارع أصبح يئن .؟
وإلى فخامتكم نبض الشارع المصرى وما به من غلط … بس من غير ما تفهمونى غلط ….؟
فخامة السيد الرئيس …
* لما مجلس نواب قعد كابس على انفاس الشعب 5 سنوات وانتهى وانحل دون ان يقدم اى شئ يذكر للمواطن حيث كان مجلس مطبلاتى للحكومة ومجلس شخصى لهم …يبقي اكيد فيه حاجة غلط ؟
* لما 90% من الشعب يرفض الذهاب إلى صناديق الانتخابات .. يبقي اكيد فيه حاجة غلط ؟
* لما يتم إحالة الشعب المصرى كله إلى النيابة فجأة بتهمة عدم المشاركة فى الانتخابات الأخيرة وأصبحنا حدوتة ومسخرة العالم كله …يبقي اكيد فيه حاجة غلط ؟
* لما رغيف العيش أصبح يقع من القفص بعد أن تم سخطه والاسرة التى كانت تشترى عشرة ارغفه مطالبه الآن ان تشترى 50 رغيف لكى يسد أفواه الأسرة … يبقي اكيد فيه حاجة غلط ؟
* لما تذكرة المترو ترتفع من جنيه إلى 12 جنيه بسرعة الصاروخ …. يبقي اكيد فيه حاجة غلط ؟
* لما المواطن أصبح مطالب كل صباح إلى مبلغ 200 جنيه مواصلات لكى يذهب إلى عمله وأولاده إلى المدارس وأحيانا نصف الأسرة لا يخرج لكى يوفر للآخر … يبقي اكيد فيه حاجة غلط ؟
*لما المدرس بيقبض مرتبه على اساس سنة 2014 وهما بيحسبوه على اساس 2020 …. طيب يعمل ايه …. يبقي اكيد فيه حاجة غلط ؟
* ولما طلاب الثانوية العامة يحجزوا أماكن فى السنتر كل سنة فى شهر 7 ….. يبقى اكيد فيه حاجة غلط ؟
* لما المواطن يدفع دم قلبه ويستدين ويستلف علشان يعلم ابنه ويطلع دكتور والولد يتفوق ويحصل على 98% ومايدخلش طب …يبقي اكيد فيه حاجة غلط ؟
* ولما المواطن يحب يدخل ابنه إحدى الكليات العسكرية.والتحريات تطلعلوا واحد قريب من الدرجة العاشرة وحش حبتين ويضيع حلم الأسرة … يبقي اكيد فيه حاجة غلط ؟
* ولما المواطن يفضل يترقي فى منصبه ومرتبه يرتقي معه ويكيف حياته على مرتبه المرتفع وبعد ما يخرج للمعاش يفاجئ بعد ما كان بيحصل على 7 آلاف مرتب ان معاشه 1200 جنيه فقط طيب يعمل ايه مافيش أمامه سوي التسول فى الشوارع لكى يوفي احتياجات أسرته … يبقي اكيد فيه حاجة غلط ؟
* ولما المواطن مايقدرش يدفع فاتورة الكهربا بعد ارتفاعها ثلاثة أضعاف فجأة ويتم قتل المحصل الغلبان على.يد مواطن أيضا غلبان …يبقي اكيد فيه حاجة غلط ؟
* لما الأسرة علشان تفطر فول وطعمية تصرف 50 جنيه ..يبقي اكيد فيه حاجة غلط ؟
* لما الشباب ال فى عمر الزهور يقدم على الانتحار والسبب مجهول … يبقي اكيد فيه حاجة غلط ؟
* لما مدير مدرسة واقف على عربية كبدة بعد الظهر والآخر مدير عام يعمل على توك تك لكى يوفوا احتياجات أسرهم بعد ارتفاع اسعار كل شئ وتدني المرتبات …. يبقي اكيد فيه حاجة غلط ؟
* ولما المواطن الغلبان حصل على شقة بالعافية بعد ان استدان من طوب الأرض علشان مكان يأويه هو وأسرته او مواطن آخر فى القرى والأرياف قام ببناء منزل صغير جدا يلمه هو وأسرته ولا يملك من حطام الدنيا.اى شئ آخر وفجأة أصبحوا مطالبين بدفع غرامة كبيرة أو يترموا فى الشارع وهم ليس لهم ذنب … يبقي اكيد فيه حاجة غلط ؟
* ولما يبقى عندنا أكبر قضية فساد في العالم وهى قيد التحقيق الآن أبطالها كلهم من كبار القوم ومبلغ الفساد يخض 247 مليار جنيه …. يبقي اكيد فيه حاجة غلط ؟
* ولما المواطن بيخاف ينام يصبح الصبح يلاقي الأسعار ارتفعت …يبقي اكيد فيه حاجة غلط ؟
فخامة السيد الرئيس شكرا على سعة صدركم وياريت ماتفهمونيش غلط
مواطن مصرى مابيحبش الغلط